ރާއްޖޭގައި ގާއިމްވެ ތިބި އިންޑިޔާގެ 70 އަށްވުރެ ގިނަ ސިފައިން ފޮނުވާލަން ރައީސުލްޖުމްޖޫރިއްޔާ ޑރ. މުޙައްމަދު މަސައްކަތްޕުޅު ފެއްޓެވުމާއެކު އިންޑިއާއިންނާއި ރާއްޖޭގައި ތިބި އިންޑިއާގެ ވާގިވެރިން ސަރުކާރަށް އިންތިހާއަށް ޕްރެޝަރުކުރިއެވެ. ރާއްޖެއަށް ކާއެތިކޮޅެއްވެސް ދެން ނުލިބޭނެ ކަމަށާއި ރާއްޖެ ދުނިޔޭގެ ސަފުން ބާކީ ވަމުންދާކަމަށް ބުނެ، ސޯޝަލް މީޑިޔާގައި އަޑުފެތުރިގެން ދިޔައީ ތިޔަ ހެނެއް ނޫނެވެ.

އެހެންނަމަވެސް ޑރ. މުޢިއްޒު ވެރިކަމާ ހަވާލުވެވަޑައިގަތުމާއެކު ރާއްޖޭގެ އަމިއްލަ ވަންނަ ރޮނގު އަމިއްލައަށް ކުރައްވަސާލެއްވިއެވެ. އެއްވެސް ޖެހިލުމެއް ބިރެއް ނެތިއެވެ. ގައުމުގެ މިނިވަންކަމާ ގުޅިފައިވާ އެރޮނގުން އިންޑިއާ ވަނީ އެތެރެވެ ރާއްޖޭގެ ދާހިލީ ކަންކަމާ ބެހެވޭ މިންވަރަށް ރާއްޖޭގެ މަސްލަހަތުގެ ތެރެއަށް ވަދެފައެވެ. ނުވަތަ ބަޔަކު ވައްދާފައެވެ.

ޑރ. މުޢިއްޒުގެ މިނިވަންކަމުގެ ނުވަތަ ގައުމިއްޔަތުގެ ރޮނގުން ބޭރަށް މިހާރު އިންޑުއާ ވަނީ ގެންގޮސްފައެވެ. އެންމެ ވަރުގަދަ ކާމިޔާބީއަކީ ރާއްޖޭގައި ގާއިމްވެގެން ތިބި އިންޑިޔާ ސިފައިން ތިން މަރުހަލާއަކަށް ބަހާލައިގެން މޭ މަހުގެ މެދާ ހަމައަށް އައިއިރު އަނބުރާ ގައުމަށް ފޮނުވާލެވުމެވެ. ދެ ހެލިކޮޕްޓަރާއި ޑޯނިއާ މަތިންދާ ބޯޓެއް ދުއްވުމުގެ ނަމުގައި ރާއްޖޭގެ ތިން ސަރަހއްދެއްގައި ގާއިމްވެ ތިބި އިންޑިއާގެ އަސްކަރިއްޔާގައި ހިމެނޭ ސިފައިން އަނބުރާ ގައުމަށް ފޮނުވާލުމުގެ މަސައްކަތްތަކާއެކު ދެ ގައުމުގެ ދެމެދުގައި ހީވެސް ނުކުރާ ވަރުގެ ނުތަނަވަސްކަމެއް ފެތުރިގެން ދިޔައެވެ. އެހެންނަމަވެސް ދިވެހި ސަރުކާރުން ދިވެހިންގެ ނިންމުން ދެމެހެއްޓުމުގައި ކުޑަވެސް ދުލެއް ނުދީ ހިފެހެއްޓިއެވެ. ނަތީޖާއަކަށްވީ ރާއްޖެއާ އިންޑިއާއާ ދެގައުމުގެ ދެމެދުގައި އެކުލަވާލި މަޝްވަރާ ކޮމިޓީން ކަނޑައެޅި ގޮތަށް ހުރިހާ ސިފައިން ދިވެހި ރާއްޖެ ދޫކޮށް ދިއުމެވެ.

"ރާއްޖޭގައި ތިބި އިންޑިއާ ސިފައިން އަނބުރާ ގައުމަށް ފޮނުވާލެވިދާނެ ކަމަށް ދުވަހަކުވެސް ގަބޫލެއް ނުކުރަން. އަދި ރާއްޖޭގައި އެހާ ގިނަ ސިފައިން ގާއިމްވެ ތިބުމަށް ކުރީގެ ވެރިން އިމެއް ނެތް މިނިވަންކަމެއް ދީފައި އޮތުމުންވެސް ހައިރާންވި،" ޑރ. މުއިއްޒު ސަރުކާރުގެ ނާއިބް ވަޒީރަކު ވިދާޅުވިއެވެ. "ޑރ. މުޢިއްޒުއާމެދު އަހަރެން ފަހުރުވެރިވަނީ އިންޑިއާ ދެކެ ބިރުން ފަހަތަށް ނުޖެހި، ދިވެހިންގެ މަސްލަހަތު ހިފަހައްޓަވައި ނަތީޖާ ނެރެދެއްވީތީ."

އިންޑިއާއިން ރާއްޖެއަށް ހަދިޔާކޮށްފައިވާ މިލިޓަރީ ހެލިކޮޕްޓަރާއި ޑޯނިއާ މަތިންދާބޯޓު ދުއްވުމަށްޓަކައި އިންޑިއާއިން އެދުނު ގޮތަށް، ކުރިން ވެސް ރާއްޖޭގައި ގާއިމްވެ ތިބި ސިފައިންނާ އެއްވަރަށް އާންމު މީހުން ރާއްޖެ ފޮނުވިއެވެ.

ރާއްޖޭގެ ފޮރިން މިނިސްޓްރީގެ އޮފިޝަލަކު ވިދާޅުވީ، އަޑި ނޭނގޭ ބައިވަރު އެއްބަސްވުންތަކެއް ދިރާސާކުރަމުން ގެންދާ ދަނޑިވަޅެއްގައި ދެގައުމުން ވެސް މަޝްވަރާކުރީ ދެބައި މީހުންގެ މަސްލަހަތުވެސް ހިމާޔަތްވާ ގޮތަށް އަދި ރާއްޖޭގެ ދާހިލީ މިނިވަންކަމަށް ބުރޫއެއް ނާރާނެ ގޮތަށް އިންޑިޔާގެ އެހީތެރިކަންވެސް ބޭނުންކުރާށެވެ. އެއީ އިންޑިއާއަކީ ރާއްޖެއަށް ދިމާވީ ބޮޑު ކޮންމެ ކަމެއްގައި އެންމެ އަވަހަށް އެހީތެރިވާ ގައުމަށްވެފައި ޖިއޯ ޕޮލިޓިކްސްގައި އިންޑިއާގެ ދައުރު ދުނިޔޭގެ ލާމެހިފައިވާ ދަލުގައި އިންތިހާއަށް މުހިއްމުވާތީއެވެ.

ރާއްޖޭގެ ބައެއް މީޑިއާތަކުން ރިޕޯޓްކޮށްފައިވާ ގޮތުގައި އިންޑިއާގެ ސިފައިން ގައުމަށް ފޮނުވާލުމަށް ފަހު ދެން ފޮނުވާލާނީ އިންޑިއާގެ އިންވެސްޓަރުންނެވެ. މިފަދަ މަޢުލޫތައް ފެންމަތިކުރުމުން ރާއްޖެއާމެދު އިންޑިއާގެ ނުތަނވަސްކަން އިތުރަށް ބޮޑުވެގެން ދިޔައެވެ. އެހެންނަމަވެސް ކަންތައް ވެގެން ދަނީ އިންޑިއާގެ މީޑިއާތަކުން މައުލޫމާތު ފެތުރި ގޮތާ ދިމާއިދިކޮޅަށެވެ.

ރާއްޖޭގައި އިންޑިއާ ސަރުކާރުގެ އެހީގައި ހިންގަމުންދާ މަޝްރޫޢުތައް ރަނގަޅަށް ކުރިއަށްދާކަމަށް އެ ޤައުމުގެ އެކްސްޓަރނަލް އެފެއަރޒް މިނިސްޓަރު ސުބްރަމާންޔަމް ޖަޔަޝަންކަރު ދާދި ފަހުން ވަނީ ވިދާޅުވެފައެވެ.ޖަޔަޝަންކަރު މިހެން ވިދާޅުވީ އިންޑިއާގެ އިޤްތިޞާދީ ކުރިމަގާ ގުޅޭގޮތުން ކޮންމެ އަހަރަކު ބާއްވާ ސީއައިއައި އެނުއަލް ބިޒްނަސް ސަމިޓްގައި ވާހަކަދައްކަވަމުންނެވެ. މި ސަމިޓުގައި ރާއްޖޭގެ ވާހަކައަށް މިހާ ބޮޑު ސަމާލުކަމެއް ދީފައި ވަނީވެސް އިންޑިއާގެ މީޑިއާތަކުން ފެންމަތިކޮށްފައިވާ އެތައް ސުވާލަކަށް ސިޔާސީވެރިން ފުރިހަމަ ޖަވާބެއް ބޭނުންވާ ކަމަށް ބުނެ، އަޑު އުފުލާފައިވާތީއެވެ. އޭނާ ވިދާޅުވީ ރާއްޖޭގައި އިންޑިއާގެ އެހީގައި ކުރިއަށްގެންދާ ތަރައްޤީގެ މަޝްރޫއުތަކަށް ސިޔާސީގޮތުން ކުދި ގޮންޖެހުންތަކެއް ދިމާވިކަމަށެވެ. ނަމަވެސް މިހާރު އެ މަސައްކަތްތައް ކުރިއަށްދަނީ ރަނގަޅަށްކަމަށް ޖަޔަޝަންކަރު ވިދާޅުވިއެވެ. ސިޔާސީ ކުދި ގޮންޖެހުންތަކާއި ހުރަސްތައް ކުރިމަތިވި ކަމަށް ޖަޔަޝަންކަރު އެވިދާޅުވަނީ އިންޑިއާއިން ހުށަހެޅި ވަރަށް ގިނަ ހުށަހެޅުންތައް ދިވެހި ރާއްޖެއިން ގަބޫލުނުކޮށް ބަދަލުތައް ގެނެސްފައިވާތީއެވެ.

ޑރ. މުއިއްޒުއާއި ހާރިޖީ ވަޒީރު މޫސާ ޒަމީރު ޗައިނާއަށް ކުރެއްވި ދަތުރުފުޅުތަކުގައި އެއްބަސްވި ގިނަ ކަންތައްތަކުގެ ސަބަބުން އިންޑިއާއިން ރާއްޖެއަށް ހުށަހަޅާފައި ވަނީ "އިންޑިއާ ފަސްޓް" ޕޮލިސީ ދޫކޮށް ނުލުމަށާއި ޗައިނާއާ ގުޅުން ބޭއްވި ނަމަވެސް، ސަރަހައްދީ މަސްލަހަތަށް ބުރޫއަރާ ފަދަ އަމަލެއް ޗައިނާއާ ގުޅިގެން ދިވެހިރާއްޖެއިން ކުރިއަށް ނުގެންދިއުމަށެވެ. އަދި ރާއްޖެއަށް ކަންކަން ނުފޮރުވުމަށާއި އިންޑިއާގެ އަވަށްޓެރިއަކީ ޗައިނާގެ ބޮޑުބަޑި ހަރުކޮށްފައިވާ ތަނެއްގެ ގޮތުގައި ނުހެދުމަށެވެ. ޖަޔަޝަންކަރު ވިދާޅުވީ، ރާއްޖޭގެ ޚާރިޖީ ވަޒީރު މޫސާ ޒަމީރު އިންޑިއާއަށް ކުރެއްވި ދަތުރުފުޅުގައި ދެ ބޭފުޅުން ބައްދަލުކުރެއްވުމަށްފަހު ކުރިއަށްވުރެ ރަނގަޅަށް ބިނާކުރަނިވި ގޮތެއްގައި މަސައްކަތްތައް ކުރިއަށްދާ ކަމަށެވެ. ޚާރިޖީ ވަޒީރު އިންޑިއާއަށް ކުރެއްވި ރަސްމީ ދަތުރުފުޅުގައި ޖަޔަޝަންކަރާ ބައްދަލުކުރައްވައި އިންޑިއާ ސަރުކާރުގެ ލޯނު އެހީއާއި ހިލޭ އެހީގައި ރާއްޖޭގައި ފަށާފައިވާ މަޝްރޫޢުތައް އަވަސްކުރުމާ ގުޅޭގޮތުން ވަނީ މަޝްވަރާ ކުރައްވާފައެވެ. މި މަޝްވަރާތައް ކުރައްވާފައިވަނީ އިންޑިއާގެ އެހީގައި ހިންގާ ބައެއް މަޝްރޫޢުތައް މަޑުޖެހިފައިވާތީ އެ މަޝްރޫޢުތައް ވީހާވެސް އަވަހަށް ނިންމާ، އޭގެ ފައިދާ ރައްޔިތުންނަށް އަވަހަށް ލިބޭނެ ގޮތް ހެދުމަށް ކަމަށް ސަރުކާރުން ވިދާޅުވެއެވެ.މި ބައްދަލުކުރެއްވުމަށްފަހު އިންޑިއާ ސަރުކާރުން ވަނީ ބަޖެޓް ސަޕޯޓުގެ ގޮތުގައި ރާއްޖެއަށް ދީފައިވާ 50 މިލިއަން ޑޮލަރު އަނބުރާ ދެއްކުމަށް ލުއި ގޮތްތަކެއްވެސް ހަމަޖައްސައިދީފައެވެ. އެގޮތުން، މި މޭ މަހު ދައްކަން ޖެހޭ 50 މިލިއަން ޑޮލަރު އަނބުރާ ދެއްކުމަށް އެއް އަހަރު ދުވަހުގެ މުއްދަތެއް އެ ޤައުމުގެ ސަރުކާރުން ވަނީ ދެއްވާފައެވެ.

މި ހުރިހާ ކަމެއްވެސް ހަމެޖެހިގެން ދިޔައީ ދިވެހި ގައުމާއި ދިވެހި ގައުމުގެ މިނިވަންކަމާއި ދިވެހި ދިދައިގެ ރަމްޒަށް ދިވެހި ސަރުކާރިން ނަސްރު ދިނުމުންނެވެ. އިންޑިއާ ދެކެ ބިރުން ފަހަތަށް ފިޔަވަޅެއް ނާޅައި، އިންޑިއާގެ މަސްލަހަތުވެސް ނުގެއްލޭ ގޮތަށް މަޝްވަރާގެ އުސޫލުން ކަންކަން ނިންމީމައެވެ. މިކަމުން އެނގިގެންދަނީ ޑރ. މުއިއްޒަކީ ވާވައުދު ފުއްދެވުމުގައި ބައިނަލް އަގުވާމީ މަސްލަހަތުވެސް ޑިޕްލޮމެޓިކް އުސޫލުން ރައްކާތެރިކޮށް ދަމަހައްޓާނެ ބޭފުޅެއް ކަމެވެ. މިހާރު އިންޑިއާއިން އެވަނީ ޑރ. މުއިއްޒު ދަންމަވާލެއްވި ގައުމިއްޔަތުގެ ރޮނގުން ބޭރުފައެވެ. އެކަމަކު އިންޑިއާގެ މަސްލަހަތު ރޮނގުގެ އެތެރޭގައި ދިވެހިންގެ ފުރިހަމަ ކޮންޓްރޯލު ދަށުގައި އެބައޮތެވެ.