ބީއެމްއެލްގެ ޑިރެކްޓަރުންގެ ބޯޑަށް ބަދަލުތަކެއް ގެނެސް، އަލަށް ތިން މެންބަރުން އައްޔަންކޮށްފިއެވެ.
މިގޮތުން ސަރުކާރުގެ ފަރާތުން އައްޔަންކުރި ތިން ބޭފުޅުންގެ ތެރެއިން އަޙްމަދު ޢަލީ ޙަބީބު (ނޫވިލާގެ، ސ. ހިތަދޫ) ބޭންކުގެ ޗެއަރޕާސަންގެ މަޤާމަށް ވަނީ ހަމަޖައްސާފައެވެ.
މިއަދު އޮންލައިންކޮށް ބޭއްވުނު ބީއެމްއެލްގެ ޙިއްޞާދާރުންގެ ޚާއްޞަ ޖަލްސާގައި، ޙަބީބުގެ އިތުރުން މުޙައްމަދު ޝާހިދު އަދި ޢަލީ ޢިރުފާން ވެސް ބޯޑަށް އައްޔަންކުރެވުނެވެ. ޝާހިދަކީ ޕެންޝަން އޮފީހުގެ ކުރީގެ ސީއެފްއޯ އެވެ. އަދި ޢިރުފާނަކީ އެކައުންޓިންގ އާއި ފައިނޭންސް ދާއިރާއިން މަތީ ތަޢުލީމު ޙާޞިލުކުރައްވާފައިވާ ބޭފުޅެކެވެ.
އަޙްމަދު ޢަލީ ޙަބީބަކީ ރައީސް ޑރ. މުޙައްމަދު މުޢިއްޒުގެ ވަޒީރުންގެ މަޖިލީހުގެ ކެބިނެޓް ސެކްރެޓަރީ އެވެ. މި ބަދަލުތަކާއެކު، ބީއެމްއެލްގެ ބޯޑުގައި ސަރުކާރުގެ ފަރާތުން ޖުމްލަ 6 މެންބަރުން ތިއްބަވާނެއެވެ. އަދި އާންމު ޙިއްޞާދާރުންގެ ފަރާތުން ތިއްބަވާނީ 3 މެންބަރުންނެވެ.
މީގެ އިތުރުން، ބޯޑު މެންބަރެއްގެ ގޮތުގައި ހުންނެވި ބީއެމްއެލްގެ ސީއީއޯ އަދި ޑެޕިއުޓީ ސީއީއޯގެ މަޤާމުތައް މިވަގުތު ހުސްވެފައިވާކަން ފާހަގަކުރެވެއެވެ. މި ބަދަލުތަކަކީ ބޭންކުގެ ހިންގުމަށް އަންނަ މުހިންމު ބަދަލުތަކެއް ކަމުގައި ބެލެވެއެވެ.
