ރާއްޖޭގައި މަސް ޕްރޮސެސްކުރާ ތިން ކާރުޚާނާއެއް ތަރައްޤީކުރުމުގެ މަސައްކަތް މިއަހަރު ފެށޭނެކަމަށް މަސްވެރިކަމާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
މަސްވެރިކަމާއި ބެހޭ ވަޒީރު މިފަދައިން ވިދާޅުވީ މަސްދޯނިތަކުގައި ލޮނުފެނުން މަސް ފިނިކުރާ ނިޒާމް ޤާއިމްކުރުމަށް ލޯނު ދޫކުރުމުގެ މަޝްރޫޢު އަލުން ފެށުމުގެ ރަސްމިއްޔާތުގައެވެ.
ވަޒީރު ޝިޔާމް ވިދާޅުވިގޮތުގައި މަސްވެރިކަމުގެ ސިނާޢަތަށް ދިމާވެފައިވާ އެންމެ ބޮޑު އެއް ގޮންޖެހުމަކީ ބާނާ މަސް ރޯމަހުގެ ގޮތުގައި އެކެކްސްޕޯޓްކުރަން ޖެހުމެވެ. މިކަމުގެ ސަބަބުން މަހަށް ލިބެންވާ ހަމަ އަގު ނުލިބޭކަމަށް ވަޒީރު ފާހަގަކުރެއްވިއެވެ. މި މައްސަލަ ހައްލުކުރުމަށްޓަކައި، އަގުއިތުރުކޮށްގެން މަސް ބޭރުކުރުމަށް ޚާއްޞަ އިސްކަމެއް ދެއްވައިގެން މަސައްކަތްތަކެއް ކުރައްވަމުން ގެންދަވާކަމަށް ވަޒީރު ވިދާޅުވިއެވެ.
މިހާރު ރާއްޖޭގައި ދުވާލަކު ޕްރޮސެސްކުރެވެނީ 110 މެޓްރިކް ޓަނުގެ މަސްކަމަށާއި، އައު ކާރުޚާނާތަކާއެކު މި ޢަދަދު 300 މެޓްރިކް ޓަނަށް އިތުރުވާނެކަމަށް ވަޒީރު ވިދާޅުވިއެވެ. މީގެ ސަބަބުން މަސްވެރިކަމުން ލިބޭ އާމްދަނީ ދެގުނަ ވާނެކަމަށް ވަޒީރު ޝިޔާމް އުންމީދުކުރައްވާކަމަށް ވިދާޅުވިއެވެ.
