ސްރީލަންކާގެ ސިޔާސީ މަޝްރަޙުގައި އެންމެ ފަހުން ދިމާވި ހައިރާންކުރުވަނިވި ބަދަލަކީ ނޭޝަނަލް ޕީޕަލްސް ޕަވަރ (އެންޕީޕީ) ގެ ލީޑަރު އަނޫރާ ކުމާރާ ޑިސެނަޔަކަ، އެ ގައުމުގެ ރިޔާސީ އިންތިޚާބު ކާމިޔާބު ކުރައްވާ ނުވަ ވަނަ އެގްޒެކެޓިވް ރައީސްގެ މަގާމަށް އިންތިޚާބު ވުމެވެ. މިއީ ކުޑަ ދުވަސްކޮޅެއްގެ ތެރޭގައި ސިޔާސީ މައިދާނުގައި ވަރަށް ބޮޑު ކުރިއެރުމެއް ހޯދި ފަރާތެއްގެ ކާމިޔާބީއެކެވެ.
ރިޔާސީ އިންތިޚާބުގެ ނަތީޖާ އާ ހަމައަށް އުމުރުން 55 އަހަރުގެ އަނޫރާ ކުމާރާ ޑިސެނަޔަކަ އަކީ ސްރީ ލަންކާގެ ސިޔާސީ މައިދާނުގައި އެހާ ބާރުގަދަ ފަރާތެއް ނޫނެވެ. އޭނާގެ ލީޑަރޝިޕްގެ ދަށުން އިއްތިހާދުވެފައިވާ ނެޝަނަލް ޕީޕަލްސް ޕަވަރ އަކީ މައި އިދިކޮޅު ފަރާތެއް ވެސް ނޫނެވެ. ޤައުމުގެ 225 މެންބަރުންގެ ގާނޫނު ހަދާ މަޖިލީހުގައި އެ އިއްތިހާދަށް ލިބިފައިވަނީ އެންމެ 3 ގޮނޑިއެވެ. ނަމަވެސް، ފާއިތުވި މަސްތަކުގައި ޑިސެނަޔަކަ ވަނީ ސްރީ ލަންކާގެ ސިޔާސީ މައިދާނުގައި ފާހަގަކުރެވޭ ޝަޚުސިއްޔަތެއްގެ ގޮތުގައި މަޝްހޫރުވެފައެވެ.
ޑިސެނަޔަކަ އަކީ ރަށްފުށުގެ މެދުފަންތީގެ އާއިލާއަކަށް އުފަން އާދައިގެ މީހެކެވެ. އޭނާގެ ބައްޕަ އަކީ ދުވަހު މުސާރައަށް މަސައްކަތް ކޮށް އުޅުނު މީހެކެވެ. މަންމަ އަކީ ގޭތެރޭގެ މަސައްކަތް ކުރުމަށް ހުސްވެ ހުރި މީހެކެވެ. އެހެން ނަމަވެސް މައިންބަފައިންގެ މަސައްކަތުން ޑިސަނަޔަކަ އަށް މަތީ ތައުލީމްއާ ހަމައަށް ވާސިލްވެވުނެވެ. އޭނާ ވަނީ ކެލަނިޔާ ޔުނިވަރސިޓީން ސައިންސސައިންސް ޑިގްރީއެއް ހާސިލުކޮށްފައެވެ.
ނިމިގެން ދިޔަ ސްރީ ލަންކާގެ ރިޔާސީ ރޭހުގައި އެ ޤައުމުގެ އެންމެ ފާހަގަކޮށްލެވޭ ސިޔާސީ ޢާއިލާތަކުގެ މޫނުތައް ފެނިގެން ދިޔަ ނަމަވެސް، ޑިސެނަޔަކަ ފާހަގަކޮށްލެވެނީ އާއިލީ ގޮތުން ސިޔާސީ ބުރަދަން ކުޑަ ފަރާތެއްގެ ގޮތުގައެވެ. މިކަން އޭނާގެ ކާމިޔާބީއަށް ހުރަހަކަށް ނުވިއެވެ.
ޑިސެނަޔަކަގެ ކާމިޔާބީގެ ސިއްރަކީ އޭނާގެ ސިޔާސީ މެސެޖް ރައްޔިތުންނާ ހަމައަށް ފޯރުކޮށްދިނުމުގެ ޤާބިލުކަމެވެ. އޭނާ ވަނީ ކޮރަޕްޝަނާ ދެކޮޅަށް ވަރުގަދަ އަޑެއް އުފުލާ، ޤައުމުގެ އިޤްތިޞާދީ ހާލަތު ރަނގަޅު ކުރުމަށް ވަރުގަދަ ވަޢުދުތަކެއް ކޮށްފައެވެ. ޑިސެނަޔަކަގެ މެސެޖްތައް ރައްޔިތުންނާ ހަމައަށް ފޯރުކޮށްދިނުމުގައި އޭނާގެ ހަރުދަނާ ވާހަކަދެއްކުމުގެ ހުނަރާއި، ސޯޝަލް މީޑިއާގެ ބޭނުން ހެޔޮގޮތުގައި ހިފުން ފާހަގަކޮށްލެވެއެވެ. އޭނާގެ ޕާޓީ، ނޭޝަނަލް ޕީޕަލްސް ޕަވަރ (އެންޕީޕީ) އަކީ ބަޣާވާތާއި ހަމަނުޖެހުމުގެ ޕާޓީއެއްގެ ގޮތުގައި ފާހަގަކުރެވުނު ނަމަވެސް، ޑިސެނަޔަކަ އަށް ވަނީ އެ އިމޭޖް ބަދަލުކޮށް، ޤައުމީ ބަދަލަށް ގޮވާލާ ލީޑަރެއްގެ ގޮތުގައި އަމިއްލަ ނަފްސު ސިފަކުރުވުމަށް ކާމިޔާބު ވެފައެވެ.
ސްރީލަންކާގެ އިޤްތިޞާދީ ހާލަތު ދަށްވެ، ސިޔާސީ ހަމަނުޖެހުންތައް އިތުރުވަމުން ދިޔަ ދަނޑިވަޅެއްގައި ޑިސެނަޔަކަ ވަނީ ރައްޔިތުންގެ އުއްމީދުތަކާ ގުޅިގެން ކުރިއަށް ދިޔުމުގެ ފުރުޞަތު ހޯދާފައެވެ. އޭނާގެ "ޤައުމީ އެއްބައިވަންތަކަމާއި ސަލާމަތީ ސިޔާސަތު" އަކީ ގިނަ ރައްޔިތުންގެ ތާއީދު ލިބުނު ކަމެކެވެ. މީގެ އިތުރުން، ކޮރަޕްޝަނާ ދެކޮޅަށް ހަރުކަށި ފިޔަވަޅުތަކެއް އަޅާނެ ކަމުގެ ވަޢުދުތަކަކީ ވެސް ރައްޔިތުންގެ ހިތްތަކުގައި ޖާގަ ހޯދި ކަންކަމެވެ.
ޑިސެނަޔަކަގެ ކާމިޔާބީއަކީ ސްރީލަންކާގެ ސިޔާސީ މަޝްރަޙުގައި އައު ބަދަލެއްގެ ފެށުން ކަމުގައި ބެލެވެއެވެ. އާދައިގެ އާއިލާއަކުން އައިސް، ކުޑަ ދުވަސްކޮޅެއްގެ ތެރޭގައި މަޝްހޫރުކަން ހޯދާ، އެންމެ ފަހުން ވެރިކަމަށް އައުމަކީ ގިނަ ބަޔަކަށް އުއްމީދީ މެސެޖެކެވެ. ނަމަވެސް، މިހާރު އޭނާގެ ކުރިމަތީގައި އޮތީ ޤައުމުގެ އިޤްތިޞާދީ އަދި އިޖްތިމާޢީ ގޮންޖެހުންތަކާ ކުރިމަތިލުމުގެ ބުރަ މަސައްކަތެވެ.
އަނޫރާ ކުމާރާ ޑިސެނަިސެނަޔަކަގެ ކުރިއެރުމަކީ ސްރީލަންކާގެ ސިޔާސީ މައިދާނުގައި ލިބުނު ހައިރާންކުރުވަނިވި ކާމިޔާބީއެކެވެ. އާދައިގެ މީހަކު ވެރިކަމަށް އައުމަކީ ޑިމޮކްރަސީގެ ހަމަތަކާ އެއްގޮތަށް ބަދަލު ގެނައުމުގެ ފުރުޞަތު ކަމުގައި ގިނަ ބަޔަކު ދެކެއެވެ. އެހެން ނަމަވެސް، މި ކާމިޔާބީގެ ފަހަތުގައި އޮތް އުއްމީދުތައް ޙަޤީޤަތަކަށް ހެދުމަކީ ޑިސެނަޔަކަގެ ކުރިމަގުގެ އެންމެ ބޮޑު ގޮންޖެހުމެވެ.
