ރާއްޖެއަށް އަންނަ ބޭރުގެ ޓޫރިސްޓު އުޅަނދުތަކުން އިތުރު ފީއެއް ނެގުމަށް ސަރުކާރުން ނިންމައިފިއެވެ.
ޓޫރިޒަމް މިނިސްޓްރީން އިއްޔެ ގެނައި ގަވާއިދު އިސްލާހަކާ ގުޅިގެން، މިހާރު ކޮންމެ ފަސިންޖަރަކަށް 5 ޑޮލަރު (77 ރުފިޔާ) ގެ ފީއެއް ދައްކަން ޖެހޭނެއެވެ.
މި ބަދަލު ގެނެސްފައިވަނީ "ދިވެހިރާއްޖެއަށް އަންނަ ބޭރުގެ ޓޫރިސްޓު އުޅަނދުފަހަރު ރާއްޖޭގައި ސަރަހައްދުގައި ދުއްވުމާއި ބަނދަރުކުރުމާ ބެހޭ ގަވައިދު" އަށް ގެނައި އެއްވަނަ އިސްލާހުގެ ދަށުންނެވެ. މި އިސްލާހު މިހާރު ވަނީ ސަރުކާރުގެ ގެޒެޓްގައި ޝާއިޢުކޮށްފައެވެ.
އާ ގަވާއިދުގެ ދަށުން، ކުރިން "ޗާޓަރ ލައިސަންސް" ގެ ނަމުގައި ދެމުން އައި ލައިސަންސް "ޕެސެންޖަރ ލައިސަންސް" ގެ ނަމަށް ބަދަލުކޮށްފައިވެއެވެ. މި ލައިސަންސަކީ އުޅަނދުގެ ފަޅުވެރިން ފިޔަވައި އިތުރު ފަސިންޖަރުން އަރުވައިގެން ދުއްވުމަށް ހޯދަންޖެހޭ ލައިސަންސެކެވެ.
އިތުރަށް ތަޢާރަފުކުރި 5 ޑޮލަރުގެ ފީއަކީ އުޅަނދަށް އަރާ ކޮންމެ ފަސިންޖަރަކަށް އުޅަނދު ފުރުމުގެ ކުރިން ދައްކަންޖެހޭ ފީއެކެވެ. މި ފީއަކީ އުޅަނދުން ދައްކަންޖެހޭ ފީއެއްގެ ގޮތުގައި ކަނޑައަޅާފައިވެއެވެ.
މީގެ އިތުރުން، ބޭރުގެ ޓޫރިސްޓު އުޅަނދުތަކުގެ އެޖެންޓުކަން ކުރެވޭނީ ހަމައެކަނި ދިވެހި ކުންފުނިތަކަށް ކަމަށްވެސް އާ ގަވާއިދުގައި ބަޔާންކޮށްފައިވެއެވެ. މި ބަދަލުގެ ދަށުން، އެޖެންޓުކަން ކުރާ ކުންފުނީގެ ހިއްސާދާރުންނާއި ބައިވެރިންގެ ގޮތުގައި ތިބެންވާނީ ހަމައެކަނި ދިވެހިންނެވެ.
