ސްޕެނިޝް ލީގުގައި ރޭ ކުޅުނު މެޗެއްގައި ރޮބަޓް ލެވަންޑޯސްކީ ޖެހި ހަމައެކަނި ގޯލުން ބާސެލޯނާއިން 1-0 އިން ގެޓަފޭ ބަލިކޮށް، ލީގުގައި މޮޅުވުމުގެ ސައްތައިން ސައްތަ ރެކޯޑް ދަމަހައްޓައިފިއެވެ.
ހަންސީ ފްލިކްގެ ކޯޗުކަމުގައި ބާސެލޯނާއިން މި ސީޒަނުގައި ސްޕެނިޝް ލީގުގައި ކުޅުނު ހަތް މެޗުންވެސް މޮޅުވެ، 21 ޕޮއިންޓް ހޯދައިފައިވެއެވެ. މިއާއެކު ބާސެލޯނާ ވަނީ ލީގުގެ އެއްވަނަ މަޤާމަށް އަރައިފައެވެ. އެންމެ ފަހުގެ ޗެމްޕިއަން، ރެއާލް މެޑްރިޑްގެ އޮތީ ހަތް މެޗުން 17 ޕޮއިންޓެވެ.
މެޗުގެ ހަމައެކަނި ގޯލު ޖެހީ 19 ވަނަ މިނެޓުގައި މި ސީޒަނުގައި ރަނގަޅު ފޯމެއް ދައްކަމުންދާ ތަޖުރިބާކާރު ފޯވާޑް، ރޮބަޓް ލެވަންޑޯސްކީއެވެ. އޭރިއާ ތެރެއިން ލިބުނު ފުރުސަތުގައި ލެވަންޑޯސްކީ ވަނީ ހަމަޖެހިލައިގެން ގޯލަށް ބޯޅަ ފޮނުވާލައިފައެވެ.
މެޗުގެ ބާކީ އޮތް ބައިގައި ދެވަނަ ލަނޑެއް ޖަހަން ބާސެލޯނާއިން ގިނަ މަސައްކަތްތަކެއް ކުރި ނަމަވެސް، ގެޓަފޭގެ ގޯލްކީޕަރު ޑޭވިޑް ސޮރިއާގެ ރަނގަޅު ކުޅުމުގެ ސަބަބުން އިތުރު ގޯލެއް ނުޖެހުނެވެ. ސޮރިއާ ވަނީ ބާސެލޯނާގެ ލަމީން ޔަމާލް އާއި ރަފީނިއާގެ ހަމަލާތައް ހުއްޓުވުމުގައި މޮޅު ކުޅުމެއް ދައްކާފައެވެ.
ގެޓަފޭއަށް މެޗު އެއްވަރުކުރުމުގެ ރަނގަޅު ފުރުސަތެއް މެޗުގެ ފަހުކޮޅުގައި ލިބުނު ނަމަވެސް، އެ ޓީމުގެ ފޯވާޑް ބޯހާ މަޔޯރާލްއަށް އެ ފުރުސަތުގެ ބޭނުން ނުހިފުނެވެ.
މި މޮޅުވުމާއެކު ބާސެލޯނާ ވަނީ ލީގުގެ އެއްވަނަ މަޤާމުގައި 4 ޕޮއިންޓުގެ ލީޑެއް ނަގާފައެވެ.
