އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އދ.ގެ އާންމު މަޖިލީހުގައި ތަޤުރީރުކުރަން ފެށުމާއެކު، ރާއްޖޭގެ ވަފުދު އެ ހޯލުން ނުކުމެއްޖެއެވެ.
މި މަންޒަރު ފެންނަ ވީޑިއޯއެއް ރައީސް އޮފީހުގެ ތަރުޖަމާނު ހީނާ ވަލީދު ވަނީ ސޯޝަލް މީޑިއާގައި ޕޯސްޓްކޮށްފައެވެ.
ހީނާ ވިދާޅުވި ގޮތުގައި، ރާއްޖޭގެ ވަފުދު އެ ހޯލުން ނުކުތީ ރައީސް މުޙައްމަދު މުޢިއްޒު ފަލަސްތީނާ މެދު ގެންގުޅުއްވާ ޚާއްޞަކަމާއި، އެ ޤައުމުގެ ޙައްޤުގައި އެމަނިކުފާނު ކުރައްވަމުން ގެންދަވާ ޚާއްޞަ މަސައްކަތްޕުޅަށް އިޙްތިރާމުކުރެއްވުމުގެ ގޮތުންނެވެ.
ނަތަންޔާހޫގެ ތަޤުރީރާއެކު އދ.ގެ އާންމު މަޖިލީހުގައި ތިބި ގިނަ ޤައުމުތަކުގެ ވަފުދުތައްވެސް ވަނީ އެތަން ދޫކޮށް ބޭރަށް ނުކުމެފައެވެ.
ފާހަގަކޮށްލެވޭ ކަމަކީ، ރައީސް މުޢިއްޒު މި ދަތުރުފުޅުގައި ފަލަސްތީނުގެ ރައީސް މަޙްމޫދު ޢައްބާސްއާ ބައްދަލުކުރައްވާ، ފަލަސްތީނަށް ރާއްޖޭގެ ތާއީދު އަލުން އައުކުރައްވާފައިވުމެވެ. އަދި އާންމު މަޖިލީހުގައި ތަޤުރީރުކުރެއްވުމުގައިވެސް ފަލަސްތީނުގެ ޙައްޤުތަކަށް ތާއީދުކުރައްވާ ވާހަކަފުޅު ދައްކަވާފައިވެއެވެ.
