އިނގިރޭސި ޕްރިމިއާ ލީގުގައި ރޭ މެންޗެސްޓާ ޔުނައިޓެޑް ދަނޑުގައި އެ ޓީމު އަތުން 3-0 އިން ޓޮޓެންހަމް ހޮޓްސްޕާސް މޮޅުވެއްޖެ އެވެ.
މެޗު ފެށިގެން ތިން ވަނަ މިނިޓުގައި ބްރެނަން ޖޯންސަން ޖެހި ލަނޑުން ޓޮޓެންހަމް އިން ލީޑު ނެގި އެވެ.
މެޗުގެ 42 ވަނަ މިނިޓުގައި ޔުނައިޓެޑްގެ ކެޕްޓަން ބްރޫނޯ ފެނާންޑޭސް އަށް ސީދާ ރަތް ކާޑެއް ދެއްކުމާ ގުޅިގެން ޔުނައިޓެޑަށް ދިމާވި ދަތިތަކުގެ ފައިދާ ނަގަމުން، ދެވަނަ ހާފުގެ ދެވަނަ މިނިޓުގައި ޑޭޖާން ކުލުސެވްސްކީ އަދި 77 ވަނަ މިނިޓުގައި ޑޮމިނިކް ސޮލާންކޭ ޖެހި ލަނޑުތަކުން ޓޮޓެންހަމް އިން ލީޑު ފުޅާކޮށް، މެޗު ނިންމާލީ އެވެ.
މި މޮޅާ އެކު، ކުޅުނު ހަ މެޗުން 10 ޕޮއިންޓާ އެކު ޓޮޓެންހަމް ވަނީ ލީގުގެ އަށްވަނައަށް އަރައިފަ އެވެ. އެހެންނަމަވެސް ކުޅުނު ހަ މެޗުން ހަތް ޕޮއިންޓާ އެކު ޔުނައިޓެޑް އޮތީ ލީގުގެ 12 ވަނައިގަ އެވެ.
މެޗަށް ފަހު ޔުނައިޓެޑްގެ ކޯޗު އެރިކް ޓެން ހާގް ވަނީ ފެނާންޑޭސް އަށް ރަތް ކާޑު ދެއްކުން ވެންދިޔައީ މެޗުގެ ކަންކަން ބަދަލުވި ސަބަބު ކަމަށާއި، މި ނަތީޖާ އަކީ ބަލައިގަންނަން އުނދަގޫ ކަމެއް ކަމަށް ބުނެފަ އެވެ.
