ޗައިނާއަކީ ރާއްޖޭގެ މުހިންމު ބައިވެރިއެއް ކަމަށާއި، އެ ގައުމާއެކު އޮންނަ ގުޅުން މުސްތަގުބަލުގައި ވެސް ދެމިއޮންނާނެ ކަމަށް ކުރީގެ ފޮރިން މިނިސްޓަރު އަދި އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ޗައިނާ އުފެދުނުތާ 75 އަހަރު ފުރުމާ ގުޅިގެން ޝާހިދު ވަނީ އެކްސްގައި ޗައިނާގެ ރައީސް ޝީ ޖިންޕިންއާއި އެހެނިހެން އިސްވެރިންނަށް ތަހުނިޔާގެ މެސެޖެއް ފޮނުއްވާފައެވެ. މި މުނާސަބަތަކީ ޗައިނާގެ މުއްސަނދި ތާރީޚާއި، ސަގާފަތާއި، ފާހަގަކޮށްލެވޭ ކާމިޔާބީތައް ފާހަގަކުރުމުގެ މުނާސަބަތެއްކަން ޝާހިދު ފާހަގަކުރެއްވިއެވެ.
ދެ ގައުމުގެ ދެމެދުގައި އޮތް ޒަމާންވީ ގުޅުމުގެ މައިގަނޑު އަސާސަކީ އެއްގައުމުން އަނެއް ގައުމަށް ކުރާ އިޙްތިރާމާއި، ކުރިއެރުން ހޯދުމުގައި ގުޅިގެން ކުރާ މަސައްކަތާއި "ވަން ޗައިނާ" ގެ އުސޫލަށް ތަބާވުން ކަމަށް ޝާހިދު ވިދާޅުވިއެވެ. އަދި ކުރިއަށް އޮތް އަހަރުތަކުގައި ވެސް ޗައިނާއަކީ ރާއްޖޭގެ މުހިންމު ބައިވެރިއަކަށް ވާނެކަން ޔަގީންކުރައްވާ ކަމަށް ވެސް ވިދާޅުވިއެވެ.
ޗައިނާއަކީ ރާއްޖޭގެ އިޤްތިޞާދީ އަދި ތަރައްޤީގެ މުހިންމު ބައިވެރިއެއް ކަމަށާއި، ވޭތުވެދިޔަ އަހަރުތަކުގައި ވިޔަފާރި، ފަތުރުވެރިކަން، އަދި އުމްރާނީ ތަރައްޤީގެ ދާއިރާތަކުން ޗައިނާގެ އެހީތެރިކަން ރާއްޖެއަށް ލިބެމުންދާކަން ފާހަގަކުރެވެއެވެ.
