އިސްރާއީލުގެ ސިފައިން ވައިގެ މަގުން ލުބުނާނަށް ހަމަލާދިނުމަށްފަހު، އެއްގަމު މަގުން ވެސް ލުބުނާނަށް އަރައިގަނެފިއެވެ.
އިސްރާއީލުން ބުނާ ގޮތުގައި މިއީ ހިޒްބުﷲ ޖަމާއަތާ ދެކޮޅަށް ވަކި ސަރަހައްދަކަށް އަމާޒުކޮށްގެން ހިންގާ އޮޕަރޭޝަނެކެވެ. ނަމަވެސް، މި ހަމަލާތަކުގައި އާންމު ރައްޔިތުން ވެސް ޝަހީދުވަމުންދާކަން ފާހަގަކުރެވެއެވެ.
އިސްރާއީލުގެ ސިފައިން ޓޭންކުތަކާއި އެހެނިހެން ހަތިޔާރުތަކާއެކު ބޯޑަރު ހުރަސްކޮށްފައިވާ ކަމަށް ބުނެފައިވާއިރު، ހިޒްބުﷲ އިން ވަނީ އިސްރާއީލުން ލުބުނާނުގައި ހިންގާ ކޮންމެ އޮޕަރޭޝަނަކަށް ވެސް ތައްޔާރުކަމަށް ބުނެފައެވެ. ހިޒްބުﷲ ޖަމާއަތުގެ އިސްވެރިއެއް ކަމަށްވާ ޝެއިޚް ނައީމް ޤާސިމް ވިދާޅުވެފައިވަނީ، އެ ޖަމާއަތުގައި ތަމްރީނު ލިބިފައިވާ 10،000 އަށްވުރެ ގިނަ މުޖާހިދުން ތިބި ކަމަށެވެ.
އިސްރާއީލުގެ ސިފައިން ލުބުނާނަށް އަރައިގަތުމާއެކު، އިސްރާއީލާއި ލުބުނާނާ ދެމެދުގައިވާ ބޯޑަރު ކައިރީގައި ތިބި ލުބުނާނުގެ ސިފައިން ވަނީ 5 ކިލޯމީޓަރު އުތުރަށް ބަދަލުކޮށްފައެވެ. މީގެ އިތުރުން، އިސްރާއީލުގެ ސިފައިން ވަނީ ލުބުނާނުގެ ދެކުނުގައިވާ އައިތާ އައް-ޝަޢާބް ސަރަހައްދުގެ އިތުރުން، ސައިދާ ސިޓީއާ ކައިރީގައި އޮންނަ ފަލަސްތީނުގެ ރެފިއުޖީ ކޭމްޕެއްގައި ހުރި އިމާރާތަކަށްވެސް ހަމަލާދީފައެވެ.
ލުބުނާނުގެ އޮފިޝަލުން ބުނާ ގޮތުގައި، އިސްރާއީލުން ދެމުންގެންދާ ލާއިންސާނީ ހަމަލާތަކުގެ ސަބަބުން ވޭތުވެދިޔަ ދެ ހަފްތާގެ ތެރޭގައި 1،000 އަށްވުރެ ގިނަ މީހުން ޝަހީދުވެފައިވާ ކަމަށާއި، އެއް މިލިއަނަށްވުރެ ގިނަ މީހުން ގެދޮރު ދޫކޮށް ދާންޖެހިފައިވާ ކަމަށް ލަފާކުރެވޭ ކަމަށެވެ.
