ފަތުރުވެރިކަމުގެ ދާއިރާއަށް އަމާޒުކޮށް، "ޑޮލަރު ޓެކްސް" އެއްގެ ގޮތުގައި ބެލެވޭ އައު ގަވާއިދެއް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު ތަންފީޒުކުރަން ފަށައިފިއެވެ.
އެމްއެމްއޭއިން މިއަދު ގެޒެޓުކުރި މި ގަވާއިދުގެ ދަށުން، ރިސޯޓުތަކާއި އިންޓަގްރޭޓަޑް ރިސޯޓުތަކުން އަންނަ ކޮންމެ ފަތުރުވެރިއަކަށް 500 ޑޮލަރުގެ ރޭޓުން މާރުކުރަން ޖެހޭނެއެވެ. އަދި ގެސްޓުހައުސްތަކާއި 50 ކޮޓަރިއަށްވުރެ މަދު ކޮޓަރި ހުންނަ ހޮޓާތަކުން އަންނަ ކޮންމެ ފަތުރުވެރިއަކަށް 25 ޑޮލަރުގެ ރޭޓުން މާރުކުރަން ޖެހޭނެއެވެ.
މި ގަވާއިދުގެ ދަށުން، ޓޫރިޒަމް ދާއިރާގެ މުދާ ވިއްކާ އަދި ހިދުމަތް ފޯރުކޮށްދޭ ހުރިހާ ފަރާތްތަކުން 30 ދުވަހުގެ ތެރޭގައި އެމްއެމްއޭގައި ރަޖިސްޓްރީ ކުރަން ހުށަހަޅަންޖެހޭނެއެވެ. އަދި ކޮންމެ މަހެއްގެ ވިޔަފާރީގެ ތަފްސީލު ޖެހިގެން އަންނަ މަހުގެ 28 ވަނަ ދުވަހުގެ ކުރިން އެމްއެމްއޭއާ ހިއްސާކުރަންޖެހޭނެއެވެ.
މި ގަވާއިދާ ހިލާފުވާ ފަރާތްތައް 5،000 ރުފިޔާއިން ފެށިގެން 1 މިލިއަން ރުފިޔާއާ ހަމައަށް ޖޫރިމަނާ ކުރެވޭނެކަމަށް އެމްއެމްއޭއިން ބުނެފައިވެއެވެ.
