1-0 ން ސައުތްހެމްޓަން ބަލިކޮށް، އިނގިރޭސި ޕްރިމިއަރ ލީގު ތާވަލްގެ އެއްވަނަ އަށް މެންޗެސްޓަރ ސިޓީ ޖެހިލައިފި އެވެ. މެޗުން ސިޓީ މޮޅުކޮށްދިން ލަނޑު ފަސްވަނަ މިނިޓްގައި ޖެހީ ފޯވާޑް ހާލަންޑެވެ.
މެޗުގައި ލަނޑުޖަހަން އިތުރު ގިނަ ފުރުޞަތުތަކެއް ހާލަންޑަށް ލިބުނު ނަމަވެސް ބޭނުން ނުކުރެވުނެވެ. ސައުތްހެމްޓަން ކޮޅަށް ހާލަންޑް ޖެހި ލަނޑަކީ މިސީޒަންގެ ލީގުގައި އޭނާގެ 11 ވަނަ ލަނޑެވެ. އަދި ސީޒަންގައި ޖުމްލަ 14 ވަނަ ލަނޑެވެ.
މެޗުން މޮޅުވެ ސިޓީއަށް އެއްވަނަ ލިބެނީ ކުރިން އެމަގާމްގައި އޮތް ލިވަޕޫލަށްވުރެ އިތުރަށް މެޗެއް ކުޅެގެންނެވެ. ދެޓީމްގެ ފަރަގަކީ ދެ ޕޮއިންޓެވެ. އެހެންކަމުން މާދަމާރޭ އާސެނަލް ބަލިކޮށްގެން ލިވަޕޫލަށް އަލުން ތާވަލްގެ އެއްވަނަ ހޯދޭނެއެވެ. އާސެނަލް އަކީ ތާވަލްގެ ހަތަރު ވަނައިގަ އޮތް ޓީމެވެ. ލިވަޕޫލް ބަލިކޮށްގެން، ލިވަޕޫލާ ޕޮއިންޓަކަށް ކައިރި ކުރުމުގެ ފުރުޞަތު އާސެނަލް އަށް އެބައޮތެވެ.
ތާވަލްގެ ތިންވަނައިގައި އޮތީ އެސްޓަން ވިލާ އެވެ.
