އަންނަ އަހަރަށް ސަރުކާރުން ހުށަހަޅާފައިވާ 56.6 ބިލިއަން ރުފިޔާގެ ބަޖެޓަކީ ރައްޔިތުންނަށް މާޔޫސްކަން ގެނުވާނެ ޓެކްސް ބޮޑު، ޚަރަދު ބޮޑު، ދަރަނި ބޮޑު ބަޖެޓެއް ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
ފައްޔާޒު ވިދާޅުވީ، މި ބަޖެޓުން އާންމު ރައްޔިތުންގެ ދިރިއުޅުމުގެ ފެންވަރު މަތި ނުވާނެ ކަމަށާއި ރައްޔިތުންނާއި ވިޔަފާރިތަކުގެ ފައިސާ ސަރުކާރަށް ޓެކްސްގެ ގޮތުގައި އިތުރަށް ނަގައި، އެ ފައިސާ ސަރުކާރުން ހަރަދު ކުރާނީ ރައްޔިތުންނަށް ފައިދާ ހުރި ކަންކަމަކަށް ނޫން ކަމަށެވެ.
ކޮވިޑު-19 ބަލިމަޑުކަމަށް ފަހު ރާއްޖޭގެ އިގުތިސޯދަށް ބޭނުންވާ އިސްލާހީ އެޖެންޑާ މި ބަޖެޓުގައި ނެތް ކަމަށް ވިދާޅުވެ ފައްޔާޒު ވަނީ ބަޖެޓު ފޫބެއްދުމަށް އަނެއްކާވެސް ސަރުކާރުން އިތުރު 16.9 ބިލިއަން ރުފިޔާގެ ދަރަނި ހޯދަން ޖެހޭ ކަމަށް ފާހަގަކުރައްވާފައެވެ.
ބޭރުގެ އެހީ ލިބުން މަދުވުމާއި ޑޮލަރު ރިޒާވު ދަށްވުމާއި ސަރުކާރުން ފައިސާ ނުދެއްކުމުގެ ސަބަބުން އަމިއްލަ ވިޔަފާރިތަކަށް ކުރިމަތިވާނެ ގެއްލުންތައް ފައްޔާޒު ވަނީ ފާހަގަކުރައްވާފައެވެ. އަދި މުސާރައިގެ ތަފްސީލުތަކާއި، މަޝްރޫއުތަކުގެ ލިސްޓެއް ބަޖެޓުގައި ހިމަނާފައި ނެތް ކަމަށާއި މިއީ ސަރުކާރުގެ ސިއްރުވެރި ސިޔާސަތަށް އތަށް އިތުރުވާ ބޮޅެއްގެ ގޮތުގައި ސިފަކުރެއްވިއެވެ.
ފައްޔާޒު ވިދާޅުވީ މިއީ މަޖިލީހުގެ މެންބަރުންނަށް ސަރުކާރު ޖަވާބުދާރީ ކުރުވަން އެޅޭނެ ހުރަހެއް ކަމަށެވެ.
