ދިވެހިރާއްޖެއިން ޕާކިސްތާނަށް ކަނޑައަޅުއްވާފައި ހުންނަވާ ސަފީރު މުހައްމަދު ތޯހާ، ޕާކިސްތާނަށް އަފްޣާނިސްތާނުން ކަނޑައަޅުއްވާފައި ހުންނަވާ މަންދޫބު ސަރުދާރު އަހުމަދު ޝަކީބާ ބައްދަލުކުރެއްވީ ދިވެހި ސަރުކާރުން ހުއްދަ ނުހޯދައި ކަމަށް ބުނެ، ފިޔަވަޅު އަޅައިފިއެވެ.
މި ބައްދަލުވުން ބޭއްވުނީ އިއްޔެ ކަމަށާއި، ދެ ގައުމުގެ ގުޅުން ބަދަހިކުރުމާ މެދު ދެ ބޭފުޅުން މަޝްވަރާކުރެއްވި ކަމަށް ބޭރުގެ މީޑިއާތަކުން ރިޕޯޓުކޮށްފައިވެއެވެ.
ޚާރިޖީ ވުޒާރާއިން މިއަދު ނެރުނު ނޫސް ބަޔާނެއްގައި ބުނެފައިވަނީ، މި ބައްދަލުވުމަކީ ދިވެހި ސަރުކާރުގެ ހުއްދައާ އެކު ކުރިއަށް ގެންގޮސްފައިވާ ބައްދަލުވުމެއް ނޫން ކަމަށެވެ. އަދި މިކަމާ ގުޅިގެން ސަރުކާރުގެ ފަރާތުން އަޅަންޖެހޭ ފިޔަވަޅު އަޅާފައިވާ ކަމަށް ބަޔާނުގައި ބުނެފައިވެއެވެ. ނަމަވެސް، އެޅި ފިޔަވަޅަކީ ކޮބައިކަން ސަރުކާރުން ހާމަކޮށްފައެއް ނުވެއެވެ.
އަފްޣާނިސްތާނުގައި ވެރިކަންކުރާ ތާލިބާނުންގެ ވެރިކަން ރާއްޖެއިން ރަސްމީކޮށް ބަލައިގެންފައެއް ނުވެއެވެ. ޚާރިޖީ ވުޒާރާއިން ބުނެފައިވަނީ، ރާއްޖެއިން ގައުމެއް ބަލައިގަތުމާ މެދު ސުވާލު އުފެދިއްޖެ ނަމަ އަބަދުވެސް ބަލަނީ އދ. އިން ކަނޑައަޅާފައިވާ މިންގަޑުތަކާއި އުޞޫލުތަކަށް ކަމަށެވެ.
އެހެންކަމުން، އަފްޣާނިސްތާނުގެ ސަރުކާރުގެ ގޮތުގައި ރާއްޖެއިން ބަލައިގަންނަނީ އދ.ގައި އަފްޣާނިސްތާނު ތަމުސީލުކުރާ ފަރާތް ކަމަށް ބަޔާނުގައި ބުނެފައިވެއެވެ. އޮގަސްޓް 2021 އިން ފެށިގެން ތާލިބާނުން އަފްޣާނިސްތާނުގައި ވެރިކަން ކުރި ނަމަވެސް އދ. އިން ތާލިބާނުންގެ ވެރިކަން ބަލައިގެންފައެއް ނުވެއެވެ. އަދި އދ. ގައި އަފްޣާނިސްތާނު ތަމުސީލުކުރަން އަދިވެސް ހުންނަވަނީ ކުރީގެ ސަރުކާރުން އައްޔަންކުރި ބޭފުޅެކެވެ.
