އެލައިޑް އިންޝުއަރެންސް ކުންފުނިން އަނެއްކާވެސް ކޭޝްލެސް ޚިދުމަތް ދޭން ފަށައިފިއެވެ.
މި ގޮތަށް ނިންމާފައި މިވަނީ ޕްރައިވެޓް އިންޝުއަރެންސް އޮތް ނަމަ އެ އިންޝުއަރެންސްގެ ލިމިޓް ހަމަވުމުން ނޫނީ އާސަންދަ ދޫނުކުރަން ސަރުކާރުން ނިންމުމާ ގުޅިގެން އިއްޔެ އެލައިޑުން ކޭޝްލެސް ޚިދުމަތް މެދުކަނޑާލުމަށްފަހުގައެވެ.
އެލައިޑުން މިހާރު ވިދާޅުވެފައިވަނީ އައުޓްޕޭޝަންޓް ޚިދުމަތް ހޯދާ މީހެއްގެ ލިމިޓް ހަމަވަންދެން ކޭޝްލެސްކޮށް ޚިދުމަތް ދޭނެ ކަމަށެވެ. މި ބަދަލާއެކު، އަމިއްލަ އިންޝުއަރެންސެއް އޮތް ފަރާތްތަކަށް ޚިދުމަތް ހޯދާއިރު ފައިސާ ދައްކަން ނުޖެހޭނެއެވެ.
ސަރުކާރުން ވަނީ އާސަންދަ ސްކީމް ރިފޯމް ކުރުމުގެ މަސައްކަތުގެ ތެރެއިން އައުޓް ޕޭޝަންޓްގެ ޚިދުމަތްތަކަށް ބިލްކުރުމުގައި ޕްރައިވެޓް އިންޝުއަރެންސަށް އިސްކަންދިނުމަށް ނިންމައިފައެވެ. ނަމަވެސް، އެންސްޕާއިން ނެރުނު ބަޔާނެއްގައި ވިދާޅުވެފައިވަނީ އެއްވެސް ފަރާތަކަށް ޕްރައިވެޓް އިންޝުއަރެންސްގެ ކަވަރޭޖް ޚިދުމަތް ނުލިބޭ ހާލަތެއްގައިވާ ނަމަ އެ ފަރާތަކަށް އާސަންދަ ސްކީމުން މިހާރު ވެސް ޚިދުމަތް ލިބެމުންދާގޮތަށް ބޭސްފަރުވާގެ ޚިދުމަތްތައް ލިބިގެންދާނެ ކަމަށެވެ.
