ރިޔާސީ އިންތިޚާބު ސެޕްޓެމްބަރު 9 ގައި
މިއަހަރު ބާއްވަންޖެހޭ ރިޔާސީ އިންތިޚާބު ސެޕްޓެމްބަރު މަހުގެ ނުވަވަނަ ދުވަހު ބާއްވާނެކަން އިލެކްޝަން ކޮމިޝަނުން އިއުލާންކޮށްފިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި އެކޮމިޝަންގެ ރައީސް ފުއާދު ތައުފީގު ވިދާޅުވީ ދެވަނަ ބުރެއް ބާއްވަން ޖެހިއްޖެނަމަ ބާއްވާނީ ސެޕްޓެމްބަރު 30 ވަނަ ދުވަހު ކަމަށެވެ. ފުރަތަމަ ބުރުގެ ނަތީޖާ ހަތް ދުވަހުގެ ތެރޭގައި އިއުލާންކުރާނެކަމަށްވެސް ވިދާޅުވިއެވެ.
މޭމަހުގެ ދެވަނަ ދުވަހު ވޯޓާސް ލިސްޓް ޢާއްމުކުރާނެކަމަށްވެސް ފުއާދު ވިދާޅުވިއެވެ. އެލިސްޓަށް ޝަކުވާ ހުށަހަޅަން އެއް މަސްދުވަސް ދިނުމަށްވެސް އިލެކްޝަން ކޮމިޝަނުން ވަނީ ނިންމާފައެވެ.
އިންތިޚާބުގައި ވާދަކުރުމުގެ ފުރުޞަތު ހުޅުވާލަނީ ޖުލައި 23 ވަނަ ދުވަހުއެވެ. ކެމްޕެއިން ކުރުމަށް އޮތް މުއްދަތަކީ އޮގަސްޓް 10 ން ސެޕްޓެމްބަރު 8 ގެ ނިޔަލަށެވެ.
