މާލޭގައި ޑޮލަރު ވިއްކަން އުޅުނު ބިދޭސީންތަކެއް ހައްޔަރުކޮށްފި
މާލޭގައި ގަވާއިދާ ޚިލާފަށް ޑޮލަރު ވިއްކަން އުޅުނު ދެ ބިދޭސީއަކު އިމިގްރޭޝަނުން ހައްޔަރުކޮށްފިއެވެ.
މި ދެ މީހުން ހައްޔަރުކޮށްފައިވަނީ އިއްޔެ ރޭ މާލޭގެ ޑޮލަރު އޭޓީއެމްތައް ކައިރީގައި ކުރިއަށް ގެންދިޔަ ޚާއްސަ ރެއިޑް އޮޕަރޭޝަނެއްގެ ތެރެއިންނެވެ.
އިމިގްރޭޝަނުން މިއަދު ޓްވިޓަރގައި ހާމަކުރި ގޮތުގައި، ހައްޔަރުކުރެވުނު ދެ މީހުންނަކީ ބަންގްލަދޭޝްގެ ރައްޔިތުން ކަމަށްވާ ބާބުލް މިއާ އާއި މުޙައްމަދު މޮކްޗަންދަލީއެވެ. މި ދެ މީހުންނަކީ ގަވާއިދާ ޚިލާފަށް ރާއްޖޭގައި އުޅެމުން ފުޅާ ދާއިރާއެއްގައި ބޭރު ފައިސާ މާރުކުރުމުގެ ވިޔަފާރިކުރި ދެ މީހުންނެވެ. އެ މީހުން ހައްޔަރުކޮށްފައިވަނީ މައްސަލަ އިތުރަށް ތަޙުޤީޤުކުރުމަށްޓަކައެވެ.
މީގެ އިތުރުން، މާޗު 9 ގައި ވެސް ޑޮލަރުގެ ވިޔަފާރިކުރި ބަންގްލަދޭޝްގެ 6 މީހަކު ހައްޔަރުކޮށް ޑީޕޯޓުކޮށްފައިވާކަން އިމިގްރޭޝަނުން ފާހަގަކޮށްފައިވެއެވެ.
ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް އިމިގްރޭޝަނުން ފުލުހުންނާ ގުޅިގެން ކުރިއަށްގެންދާ އޮޕަރޭޝަންގެ ދަށުން މިހާތަނަށް 1،800 އަށްވުރެ ގިނަ ބިދޭސީން ވަނީ ޑީޕޯޓުކޮށްފައެވެ. އަދި އިތުރު 100 އަށްވުރެ ގިނަ މީހުން ފަހުން ވެސް އިމިގްރޭޝަންގެ ބެލުމުގެ ދަށަށް ގެންގޮސްފައިވެއެވެ.
ސަރުކާރުން މި މައްސަލަ ހައްލުކުރުމަށް އިތުރު ފިޔަވަޅުތަކެއް އަޅަމުންދާއިރު، 'ކުރަނގި' ނަމުގައި ބިދޭސީންގެ ބަޔޮމެޓްރިކް ޑާޓާ އެއްކުރުމުގެ އޮޕަރޭޝަނެއް ވެސް ކުރިއަށްދާކަން އިމިގްރޭޝަނުން ފާހަގަކޮށްފައިވެއެވެ.
