![](https://outreach.mv/storage/d/e8oe8fC1l8Aj3UwDXImnMiv1F6eUrLrcs6P29Xms.jpeg)
ރާއްޖޭގައި ޑޮކްޓަރުކަން ކިޔެވި ފުރަތަމަ ބެޗުގެ ހުރިހާ ދަރިވަރުން ފާސްވެއްޖެ
މޯލްޑިވްސް ނޭޝަނަލް ޔުނިވަރސިޓީ (އެމްއެންޔޫ) ގެ މެޑިސިން ސްކޫލުގައި ޑޮކްޓަރުކަން ކިޔެވި ފުރަތަމަ ބެޗުގެ ހުރިހާ ދަރިވަރުން އިމްތިހާނުން ފާސްވެ، ކިޔެވުން ފުރިހަމަކޮށްފިއެވެ. މިއީ ރާއްޖޭގެ ތަޢުލީމީ ދާއިރާއަށާއި ސިއްޙީ ދާއިރާއަށް ލިބުނު ވަރަށް ބޮޑު ކާމިޔާބީއެކެވެ.
![](https://outreach.mv/storage/ads//SQSAKkifcz5tKHw5mbGVrW4168t7gCrYdglMlTKB.jpeg)
ރާއްޖޭގައި މެޑިސިން ކިޔަވައިދޭން ފެށީ 2018 ވަނަ އަހަރުގެ ސެޕްޓެންބަރު މަހުގައެވެ. މެލޭޝިޔާގެ ގައުމީ ޔުނިވަރސިޓީއެއް ކަމަށްވާ ކެބެންސާންއާ ގުޅިގެން އެމްއެންޔޫގެ މެޑިސިން ސްކޫލުގެ ފުރަތަމަ އެމްބީބީއެސް ކޯސް ފެށީ އެ އަހަރުއެވެ.
އެމްއެންޔޫއިން މިރޭ ކުރި ޓްވީޓެއްގައި ބުނެފައިވަނީ، އިމްތިހާނުން ފާސްވި ރާއްޖޭގައި ޑޮކްޓަރުކަން ކިޔެވި ފުރަތަމަ ބެޗަށް މަރުހަބާ ދަންނަވާ ކަމަށެވެ. އަދި މިއީ ގައުމީ ޔުނިވަރސިޓީއަށާއި ރާއްޖެއަށް ލިބުނު ތާރީޚީ ކާމިޔާބީއެއް ކަމަށް ވިދާޅުވިއެވެ.
"މި ބެޗުގެ ހުރިހާ ދަރިވަރުން ފާސްވުމަކީ ކުރި މަސައްކަތުގެ ނަތީޖާ، އެކަމާ މެދު ފަޚުރުވެރިވަން،" އެމްއެންޔޫގެ ޓްވީޓުގައި ބުނެފައިވެއެވެ.
މިހާރުވެސް އެމްއެންޔޫގެ ސްކޫލް އޮފް މެޑިސިންގައި ގިނަ އަދަދެއްގެ ދަރިވަރުން ތަޢުލީމު ހާސިލުކުރަމުންދާއިރު، ބައިނަލްއަޤްވާމީ މިންގަނޑުތަކަށް ފެތޭ ކަރިކިއުލަމަކާ އެކު ކިޔަވައިދެމުން ގެންދެއެވެ. މި ކާމިޔާބީއަކީ ރާއްޖޭގެ ސިއްހީ ދާއިރާއަށް ލިބުނު ބޮޑު ކުރިއެރުމެއް ކަމަށް ބެލެވެއެވެ.
މި ކާމިޔާބީއާއެކު، ރާއްޖޭގެ ސިއްޙީ ދާއިރާއަށް އިތުރު ބާރެއް ލިބި، ދިވެހި ޑޮކްޓަރުންގެ އަދަދު އިތުރުވެގެންދާނެ ކަމަށް އުންމީދު ކުރެވެއެވެ. މީގެ އިތުރުން، ރާއްޖޭގައި މެޑިކަލް އެޑިޔުކޭޝަންގެ ފެންވަރު މަތިވެ، ކުރިއަރައިގެން ދިއުމަށް މަގުފަހިވެގެންދާނެ ކަމަށްވެސް ބެލެވެއެވެ.