މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ހާމަކޮށްފައިވާ ގޮތުގައި މިއަހަރުގެ ދެވަނަ ކުއާޓަރުގެ ނިޔަލަށް ޓީޖީއެސްޓީ އާއި ގްރީން ޓެކްސް ނުދައްކާ 170 ކުންފުނި އެބަހުއްޓެވެ. މި މަޢުލޫމާތު މީރާއިން ހާމަކޮށްފައިވަނީ މިދިޔަ ބުރާސްފަތި ދުވަހު އާންމުކުރި ލިސްޓެއްގައެވެ. މި ލިސްޓުގައި ހިމެނެނީ ޓީޖީއެސްޓީ އާއި ގްރީން ޓެކްސްގެ ގޮތުގައި ނުދައްކާ އޮތް ޖުމްލަ އަދަދު އެއް ލައްކަ ރުފިޔާއަށް ވުރެ އިތުރުވާ ކުންފުނިތަކެވެ. މީގެ ތެރޭގައި ކުރިން ވެސް ޓެކްސް ނުދައްކައިގެން މީރާއިން ނަން ހާމަކޮށްފައިވާ ބައެއް ކުންފުނިތަކާއި މަޝްހޫރު ގެސްޓުހައުސްތަކާއި ފަތުރުވެރިކަމުގެ ޚިދުމަތްދޭ ގެސްޓުޝޮޕު ފަދަ ތަންތަން ހިމެނެއެވެ. މީރާއިން ބުނެފައިވާ ގޮތުގައި މި ލިސްޓު އާންމުކުރުމުގެ ކުރިން އެ ފަރާތްތަކަށް ފައިސާ ދެއްކުމަށް ތަފާތު ގޮތްގޮތުން ހަނދާންކޮށްދީ، އެކި ބާވަތުގެ ނޯޓިސްތައް ފޮނުވައި، އިތުރު މުއްދަތުތައް ވެސް ދީފައިވެއެވެ. މީގެ ތެރޭގައި އޮޓޮމެޓިކް ރިމައިންޑަރ ކޯލްތަކާއި، އެސްއެމްއެސް މެދުވެރިކޮށް ހަނދާންކޮށްދިނުމާއި، ފުރަތަމަ ނޯޓިސް އަދި ފައިނަލް ނޯޓިސް ފޮނުވުން ހިމެނެއެވެ. އަދި މީރާއިން ވަނީ އެއްފަހަރާ ފައިސާ ދެއްކެން ނެތް ފަރާތްތަކަށް އިންސްޓޯލްމަންޓު އުސޫލުން ބަހާލައިގެން ފައިސާ ދެއްކުމުގެ ފުރުޞަތު ވެސް ދީފައެވެ. އެފަދަ އެއްބަސްވުމެއް ހަދައި، ފައިސާ ދައްކާނަމަ އެންފޯސްމަންޓުގެ އިތުރު ފިޔަވަޅުތައް ނާޅާނެ ކަމުގެ ޔަގީންކަން ވެސް މީރާއިން ދީފައިވާ ކަމަށް ބުނެފައިވެއެވެ. ނަމަވެސް، ދައުލަތުން ލިބެންޖެހޭ ފައިސާއެއް ނުލިބިގެން ޓެކްސް ނުދެއްކި އޮތް ފަރާތްތަކުން އެކަން ބަޔާންކޮށް، ކަމާގުޅޭ ލިޔެކިޔުންތައް ހުށަހަޅައިފިނަމަ އެފަދަ ފަރާތްތަކުގެ ނަން މީރާއިން ހާމަނުކުރާނެ ކަމަށްވެސް ބުނެފައިވެއެވެ.